Marot, Clément (1496 - 1544) A la fille d’ung Painctre d’Orléans belle entre les autres Au temps passé, Apelles, Painctre sage, Feit seullement de Venus le visage Par fiction, mais (pour plus hault attaindre) Ton Pere a faict de Venus (sans rien faindre) Entierement la face & le corsage. Car il est Painctre & tu es son ouvrage, Mieulx resemblant Venus de forme & d’aage Que le Tableau qu’Apelles voulut paindre Au temps passé. Vray est qu’il feit si belle son ymage Qu’elle eschauffoit en Amour maint courage ; Mais celle là que ton Pere a sceu taindre I mect le feu & a dequoy l’estaindre. L’aultre n’eut pas ung si gros advantage Au temps passé.