Marot, Clément (1496 - 1544) Psalme de David 113 Pseaulme Cent Treiziesme Laudate pueri, Dominum. Argument : Il invite à louer Dieu, de ce qu'il regarde, gouverne et mue toutes choses selon sa prudence, tousjours eslevant les humbles, et restablissant les miserables. Pseaulme pour consoler les povres et les femmes steriles. Enfants, qui le Seigneur servez, Louez le, et son Nom eslevez, Louez son Nom, et sa haultesse : Soit presché, soit faict solennel Le Nom du Seigneur eternel, Par tout, en ce temps, et sans cesse. D'Orient jusqu'en Occident Doibt estre le loz evident Du Seigneur, et sa renommée : Sur toutes gens le Dieu des Dieux Est exalté, et sur les cieulx S'esleve sa gloyre estimée. Qui est pareil à nostre Dieu, Lequel faict sa demeure au lieu Le plus hault, que l'on sçauroit querre ? Et puis en bas veult devaller, Pour toutes choses speculer, Qui se font au ciel, et en terre ? Le paovre sur terre gisant Il esleve en l'authorisant, Et le tire hors de la boue, Pour le colloquer aux honneurs Des seigneurs, j'entends des seigneurs Du peuple, que sien il advoue. C'est luy qui remplit à foison De tres beaulx enfants la maison De la femme, qui est sterile : Et luy faict joye recevoir, Quand d'impuissante à concepvoir, Se voyt d'enfants mere fertile.