Marot, Clément (1496 - 1544) Psalme de David 011 Pseaulme Unziesme, à deux coupletz, différents de chant, chascun couplet d'ung verset In Domino confido. Argument : Il se complainct de ceulx qui le chassoyent de toute la terre d'Israel. Puis chante sa confiance en Dieu, et le jugement d'icelluy sur les bons, et sur les mauvais. Pseaulme consolatif pour ceulx qui sont en tribulation, et mis hors de grâce de leurs seigneurs. Veu que du tout en Dieu mon cueur s'appuye, Je m'esbahy, comment de vostre mont, Plustost qu'oyseau dictes que je m'enfuye. Vray est que l'arc les malings tendu m'ont, Et sur la corde ont assis leurs sagettes, Pour contre ceulx, qui de cueur justes sont, Les descocher, jusques en leurs cachettes. Mais on verra bien tost à neant mise L'intention de telz malicieux, Quel' faulte aussi a le juste commise ? Sachez que Dieu a son Palays aux cieulx : Dessus son Throsne est l'Eternel Monarque : Là hault assis, il voyt tout de ses yeulx, Et son regard les humains note, et marque. Tout il espreuve, et le juste il approuve : Mais son cueur hayt, qui ayme extorsion, Et l'homme en qui violence se trouve. Pleuvoir fera feu de punition Sur les malings, soulphre chaud, flamme ardente, Vent fouldroyant : voylà la portion De leur brevage, et leur paye evidente. Car il est juste, et pource ayme justice : Tournant tousjours par doulce affection Vers l'homme droict son oeil doulx, et propice.