Du Bellay, Joachim (1522 - 1560) Antiquitez de Rome 12 Telz que lon vid jadis les enfans de la Terre, Plantez dessus les monts pour escheller les cieux, Combattre main à main la puissance des Dieux, Et Juppiter contre eux, qui ses foudres desserre : Puis tout soudainement renversez du tonnerre Tumber deçà delà ces squadrons furieux, La Terre gemissante, et le Ciel glorieux D’avoir à son honneur achevé ceste guerre : Tel encor’ on a veu par dessus les humains Le front audacieux des sept costaux Romains Lever contre le ciel son orgueilleuse face : Et telz ores on void ces champs deshonnorez Regretter leur ruine, et les Dieux asseurez Ne craindre plus là hault si effroyable audace.