verse.fr - Rutebeuf : Povretei Rustebuef





Rutebeuf (1230? - 1285?)

La Povretei Rustebuef

Je ne sais par ou je comance
Tant ai de nature abondance
Por parler de ma povreté.
Por Dieu vos pri, frans Rois de France,
Que me donez quelque chevance,
Si ferez trop grant charité.
J’ai vescu de l’autrui chaté
Que l’en m’a creu et presté ;
Or me faut chascuns de creance,
Qu’on me set povre et endeté :
Vos r’avez hors du regne esté
Ou tote avoie m’atendance.

Entre chier tenz et ma mesnie,
Qui n’est malade ne fenie,
Ne m’ont laissié deniers ne gages ;
Gent truis d’escondire aramie
Et de doner mal enseignie ;
Du sien garder est chascun sages.
Mors me r’a fet de granz damages,
Et vos, bons Rois en deus voiages
M’avez bone gent esloignie,
Et li lointainz pelerinages
De Tunes qui est leus sauvages
Et la male gent renoïe.

Granz Rois, s’il avient qu’a vos faille
(A toz ai je failli sanz faille)
Vivres me faut et est failliz.
Nus ne me tent, nus ne me baille ;
Je touz de froit, de faim baaille,
Dont je sui mors et maubailliz.
Je sui sans cotes et sanz liz ;
N’a si povre jusqu’à Senliz.
Sire, si ne sai quel part aille ;
Mes costez conoit le pailliz,
Et liz de paille n’est pas liz,
Et en mon lit n’a fors la paille.

Sire, je vos faz a savoir :
Je n’ai de quoi du pain avoir ;
A Paris sui entre toz biens,
Et n’a a nul qui i soit miens.
Pou i voi et si i preng pou ;
11 m’i sovient plus de saint Pou
Qu’il ne fet de nul autre apostre.
Bien sai Pater, ne sai qu’est nostre,
Que li chiers tenz m’a tot osté,
Qu’il m’a si vuidié mon osté
Que li Credo m’est deveez
Et je n’ai plus que vos veez.